![](/america/cpscustour97/images/trip/19970503_019.jpg)
CPSC 四天王眾於 Union Square
|
|
|
由於今天我們到了很多地方,所以今天的故事會分幾個部分。
我地之前探完阿 Seattle,終於都黎黑邦老大三藩市個地盤喇。
我地頭先訂o左酒店,所以一到 San Fran 就想直接「渣」車去酒店 check-in 先,然後再出去食野。(無錯,係要出去食o野,因為我地 CPSC 6子坐o左成日車,食得唔係幾好,當然來到大城市就要搵番 D 好o野食啦,係咪?)
|
Cable Car 等待中
|
|
|
|
之不過,一入三藩市o個陣,我地既地圖組組長米雪兒發現我地係無一張比較 detail o既三藩市地圖,所以就要求司機停係油站買番張黑邦地盤地圖。我地好容易就搵到間油站,
但係好奇怪,個油站明明開晒燈,仲有個黑珍珠係舖頭入邊添,但係舖頭個門就點都開唔到既,點解呢? 原因好簡單,話明呢到係黑邦地盤,D 治安都有番咁上下啦,所以係夜晚既時候,
油站 D 便利店o既門都唔開,係得收銀處有個窗口仔,而黑夜交易就係o係呢個窗口仔進行架喇。咁黑邦地盤治安咁好,我地會搵邊個落車同黑珍珠講數呢? 呢個咁重要既任務,
卒之係屈o左食屎部長馮海帆小朋友負責。而隊長可能因為護子心切,走埋落車保護阿帆添!
|
|
|
|
|
Cable Car 的武力修行
|
|
|
|
最後當然係買到地圖啦,而地圖當然會係地圖組長米雪兒 keep 住啦,而又因為米雪兒對地圖認識甚深,所以我地好容易(真係好容易!) 就搵到 Days Inn 喇!
三藩市 downtown D 路又高又低咁,「渣」車又上又落,真係幾得意,幾好玩。
去到酒店,我地o既偷渡時間又到喇!開頭係阿 Ben 同 Michelle 落車 check-in,咁其他人就係架車度等。以為入邊 D 人會睇唔到我地啦,但係我地竟然百密一疏,
車頭o個度竟然有個神秘既閉路「昅」o野機係度「昅」緊我地,不過後來阿 Ben 講番入邊個阿伯「曚成成」,可能睇唔到喎!
|
身在 Union Square 的 Ben
|
好喇,上去間房度,發覺間房勁大,有兩張床。其中一張床大到可以三個人同時「訓」一張!偷渡完畢,緊接住o既係食野時間喇!我地放低晒 D 行李,就即刻行動喇!
阿 Ben Ben 飛車去o左黑邦唐人街,發覺係一條大斜路,無咩燈咁,暗暗地,夠神秘。而我地就周圍兜,睇下邊間餐館仲未收,卒之係街口見到間野燈火通明,入邊人氣又夠,好似係黑邦唐人街o個度唯一一間白店咁,所以我地就決定去o個度食喇!
|
|
|
這不是公共汽車,而是車票售賣處
|
之後,阿 Ben Ben 就係餐館對面搵位泊車啦。落車之後,無端端有個唔知咩水,長長地頭髮,有 D 污污糟糟,可能係飲醉酒既亞裔既「佬」,口 up up 咁又指住我地架車既胎,唔知佢講咩野,卒之我地都無理到佢,就過對面馬路間餐館。
我地班 Comp Science 男士都幾有風度,怕兩個女仔自己行危險,所以就叫兩個女仔行係中間,保護佢地咁話喎!
係餐館門口,只見餐館裡面多數都係「鬼」,所以大家就開始猶豫究竟呢間o野係咪又係 D 呃鬼佬o既唐人餐館。正當大家仲係度考慮究竟入唔入去好o個陣,裡面 D waiter 已經開門出黎招呼我地啦,咁就唯有入去啦! 唔通掉頭走咁核突咩?
入到去坐o左張大檯,叫o左 D 炒麵飯例牌o野。我地然之後見到廚房火氣,鍋氣奇高,即刻知道呢間白店 D 野食唔會衰得去邊。果然,D o野出得好快,味道亦係勁好,真係好味暖心頭,好想大叫:「好味啊!」 而我地食o左無幾耐,就已經將全部o野清晒!之後,呢間餐館,
就俾我地封為「全北美最好食」既度人餐館 ——「悅利」喇!
|
係各位團友食完o野閑談之餘,阿 Ben Ben 出去出邊食佢既飯後甜品,而我地就講多陣就埋單喇。出o左門口,發覺有好多警車聲,一時係左邊響起,一時係右邊傳黎。根據阿 Ben 呢個唯一o既目擊證人所講,美加鴨仔團懷疑係有一邦黑鬼偷o左架跑車,走佬時又見到差佬,雙方無端端想玩賽車之故。
對對錶,原來已經三點幾。我地 CPSC 6子竟然仲係黑邦唐人街走黎走去,驚死無人打劫咁,卒之個個「o拿o拿聲」上番車,番酒店「訓」覺去也…
|
發冷o既 Gilbert
|
|
|
![](/america/cpscustour97/images/trip/19970503_020.jpg)
City tour o既售票處,不過我地無去到
|
翌日
天亮之時,警車嗚嗚之聲不絕於耳,位於黑邦城市中心的 Days Inn,六位便衣探員如常輪流入 I/O,穿上裝備,準備出發,調查一下黑邦城市的罪惡率究竟有多高。
一行人浩浩蕩蕩,由歇腳處以地毯式搜查的方法,慢慢的步去罪惡大本營 Union Square。在那兒,有一群日藉黑邦份子,以鼓敲樂,作出黑邦入會儀式的過程。六位便衣探員順利混入黑邦深處,亦在那時得知,黑邦有兩款無敵戰車:其中一款戰車是以路軌行駛的 cable car,而另一款戰車則有 cable car 的外殼,卻不以路軌行駛,
而是用普通車輪,自由自在的在馬路上飛馳。
乘搭路軌 cable car 的車站竟然是在黑邦大街上路中間的一個安全島上。欲搭 cable car 的乘客須在小小的安全島上排隊等候。六名探員為了對黑邦要有更深一層了解,不惜付出生命的危險,在「車來車往」的大馬路中間等待路軌 cable car。當 cable car 來了,大家也爭先恐後的上車而向黑邦漁人碼頭進發。
|
|
|
聽說黑邦漁人碼頭的罪惡交易成交價,每天都會在天文數字之上。除此之外,更有多位美女貨物等,供黑邦賊家選購。這種地方,六名探員怎有不去之理?
六人上了路軌戰車,但見黑邦司機站在中央,手執一枝狀似狼牙棒的東西,用來控制戰車。黑邦司機有一名拍擋,通稱為黑邦收錢員,只因所有黑市居民(會員與非會員)都要交「過路費」給黑邦總會。「過路費」是每位美金二元正。
路軌戰車特別之處,除了戰車是以狼牙棒控制之外,車身的兩邊設有扶手,供各位買家 show「哥利」之用。Show 什麼「哥利」? 正是各人的武功。當買家站在戰車邊緣之時,必須運起內功,緊握扶手,除此之外,買家在戰車行駛之時,亦須回頭觀看黑邦城市的各地環境。正因如此,能達到黑邦漁人碼頭的也非等閒之輩,都是武功高強的武林高手。
正所謂:「有命上車,未必有命下車」。
|
三藩市的 downtown
|
|
|
|
這些絕 poses…
|
|
|
|
黑邦漁人碼頭某一角
|
幸運地,六名武功高強,美貌與智慧並重的便衣探員順利混進這個黑邦漁人碼頭。
六人步下戰車,但見前方一座圓柱形的黑色物體,不知何物,物體門上卻寫著「washroom」的字樣。六人奉命混入黑邦城市,定當全力搜查全市的每一處地方,於是其中一名陣姓探員(因為要保護探員的性命安全,所以只登出探員的姓氏)付出身家美金 0.25 元,進入 cyber 洗手間查看。約半分鐘後,陳姓探員發覺內裡並無異狀,故復返出來。為免他人有所懷疑,
該名陳姓探員於「出關」之時,裝出一個「完滿解決」的舒服狀。
|
|
|
一行人經過廁所風雲之後,繼續勇往直前,深入虎穴,開工大吉,前無古人,後無來者般進入黑邦漁人碼頭的心臟地帶。
沿路上有不少黑邦店舖,賣著各式各樣的黑邦精品,種類繁多。而最受買家歡迎的黑邦精品竟不是白粉或丸仔之類,卻竟然是黑邦戰車 cable car 的音樂盒。那些音樂盒有大有小,不知有什麼玄虛。各探員都心想,這些盒子定有些特別暗格,以方便收藏大量毒品。有見及此,數名探員都欲購買數個,以備他日返回警局後,得以向上頭交代。但是若在此時購買,
想必會帶來行動之不便,所以各人決定,在回程之時才向黑店購買。
各人再步行多一會,見一些店舖之外,擺放著一些「壓錢機」,只須放一個 penny 進機內,另加美金五毫至一元便可把那 penny 壓平,印上黑邦城市的名勝古蹟,例如黑邦金門橋或漁人碼頭的風貌,甚為奇特。此乃為黑邦買家所喜愛的收藏精品之一。只因這種精品比黑邦戰車音樂盒便宜得多了,所以六名探員都爭先恐後的瘋狂選購。
|
Cool Ben
|
不一會,各人都感到餓了,逐尋找一處可供食用之所。行著行著,猝然發現對面有一所中國食店,六名探員均是中國人,在這種情況之下,看見一所中國食店,親切之情不由自生,歡天喜地的向那食店走去。不料,正當帶頭隊長陳姓(男)探員剛要踏進食店說出:「六位」的時候,該名陳姓探員忽然嗅到一些黑邦氣味,此氣味異常熟悉,
與六人家鄉大學的「襪河」食堂(又名「麥河大飯店」)裡某一間中國食店所發出的「呃鬼佬」氣味極為相似。故那陳姓採員即時止步,阻止其他探員入內。
六人同時搖頭嘆息,暗嘆為何這樣,可是黑店可以不入,肚子卻不可不醫,所以馮姓探員帶領各人去一間日本食店,暫時投靠「日本仔」,他日才報國仇也不遲。各人食飽後,為了不想沾上「賣國賊」的污名,六人都匆匆離開,再往黑邦漁人碼頭深處進發。
|
|